Kryetari i KMSH-së Skender Bruçaj uron Muajin e Bekuar të Ramazanit

urim Ramazani

Bismilahi Rrahmani Rrahim!

Me emrin e Zotit, Mëshiruesit, Mëshirëbërësit!

 

TË DASHUR BESIMTARË MYSLIMANË

TË NDERUAR BASHKËKOMBËS kudo që ndodheni, në Shqipëri dhe anembanë botës.

Në emër të Komunitetit Mysliman të Shqipërisë dhe në emrin tim personal, kam kënaqësinë dhe nderin t’Ju uroj:

Gëzuar muajin e begatë të Ramazanit. Agjërim të lehtë e të pranuar.

Nesër është dita e parë e agjërimit të Ramazanit, muajit të paqes, solidaritetit dhe Mëshirës Hyjnore.

Agjërimi është një institucion moralo-shpirtëror, që zhvillon te njeriu ndjenja të tilla si: mëshirën, dhembshurinë, respektin ndaj tjetrit, bamirësinë dhe sinqeritetin, por, mbi të gjitha, na afron dhe na bën më shumë falënderues e mirënjohës ndaj Zotit tonë.

Allahu i Gjithëmëshirshëm në këtë muaj hap dyert e mëshirës dhe mirësisë për të gjithë besimtarët, të cilët e kryejnë këtë adhurim me përkushtim e devotshmëri.

Muaji Ramazanit është muaji i Kur’anit Fisnik, prandaj le të jetë ky muaj i bekuar, muaji i përkushtimit drejt kuptimit më të mirë të mesazhit hyjnor dhe përfaqësimit të vlerave tona islame.

TË DASHUR BESIMTARË!

Agjërimi në këtë muaj na rikujton detyrimin që kemi kundrejt të gjitha shtresave të shoqërisë që kërkojnë kujdesin dhe vëmendjen tonë.

Ramazani është një ftesë hyjnore për të gjithë ne, për të trokitur në portën e Mëshirës së Pafundme, të të Gjithëmëshirshmit. Prandaj, le të shërbejë ky muaj për faljen e mëkateve, për pranimin e lutjeve dhe adhurimeve, për maturimin e zemrave, për fisnikërimin e ndjenjave dhe përkushtimin ndaj fitimit të kënaqësisë së Krijuesit të gjithësisë.

TË NDERUAR MOTRA DHE VËLLEZËR, në Shqipëri dhe jashtë saj, duke ju uruar edhe një herë përzemërsisht muajin e bekuar të Ramazanit, lus Allahun e Madhëruar, që t’ju japë ju dhe familjeve tuaja, shoqërisë dhe kombit tonë, begati e mirësi.

Zoti ju bekoftë.

Video e urimit të kryetarit

You must be logged in to post a comment Login